children dressed up as Sri Krishna: శ్రీకృష్ణ జన్మాష్టమి వచ్చిందంటే ప్రతి ఇంట్లోనూ పండుగ వాతావరణం కనిపిస్తుంది. ముఖ్యంగా చిన్నారులకు బాలకృష్ణుడి వేషం వేయించడం చాలాకాలంగా కొనసాగుతున్న సంప్రదాయం. చిన్నారి తలపై నెమలి పింఛం, చేతిలో వేణువు, ఒంటిపై పీతాంబరం, మెడలో ఆభరణాలతో బాలకృష్ణుడిలా ముస్తాబు చేస్తారు. అయితే అసలు పిల్లలకు కృష్ణుడి వేషం ఎందుకు వేస్తారు? కృష్ణుడి బాల్యంలో ఎలాంటి కష్టాలు ఎదురయ్యాయి? 12 సంవత్సరాల లోపు మాత్రమే కృష్ణుడి వేషం వేయాలనే సందేహం చాలా మందికి వస్తుంది. దీనిపై ఈ పండితుడు ఏం చెబుతున్నాడో చూడండి..
బాలకృష్ణుడి వేషం ఎందుకు వేస్తారు?
శ్రీకృష్ణుడు విష్ణువు అవతారంగా హిందూ సంప్రదాయంలో ఎంతో ప్రత్యేకమైన స్థానం పొందాడు. అయితే ఆయన బాల్య రూపం భక్తుల్లో మరింత ప్రత్యేకమైన అనుబంధాన్ని కలిగిస్తుంది. వెన్న దొంగిలించడం, గోపబాలురతో ఆడుకోవడం, యశోదమ్మతో బాల్య అల్లరి చేయడం వంటి కృష్ణుడి బాల్యలీలలను గుర్తు చేసుకుంటూ చిన్నారులకు బాలకృష్ణుడి వేషం వేయిస్తారు.ఇది కేవలం అలంకరణ లేదా అందం కోసం చేసే కార్యక్రమం కాదు. పిల్లలకు పురాణ కథలను పరిచయం చేయడం, కృష్ణుడి బాల్యలీలల గురించి చెప్పడం, పండుగ ప్రాముఖ్యతను తెలియజేయడం కూడా దీని వెనుక ఉన్న ముఖ్యమైన ఉద్దేశాలుగా చెప్పవచ్చు.
అంతేకాకుండా వీడియోలో పండితుడు చెబుతున్న ప్రకారం.. మొదటి 4 సంవత్సరాలు తల్లి ద్వారా పడిన కష్టాలు.. ఆ తరువాత 4 సంవత్సరాలు తండ్రి ద్వారా పడిన కష్టాలను చూస్తారు. ఇలా మొత్తం 12 ఏళ్లపాటు బాలారిస్టాలు చూస్తారు.
కృష్ణుడు ఎదుర్కొన్న బాలారిష్టాలు అంటే ఏమిటి?
పురాణ కథనాల్లో కృష్ణుడి బాల్యంలో అనేక ప్రమాదకరమైన సంఘటనలు ఎదురైనట్లు చెబుతారు. ముఖ్యంగా పూతన, శకటాసురుడు, తృణావర్తుడు, వత్సాసురుడు, బకాసురుడు వంటి రాక్షసులతో ఆయనకు సంబంధించిన బాల్యకథలు ప్రసిద్ధి చెందాయి. కృష్ణుడు చిన్న శిశువుగా ఉన్న సమయంలో పూతన అనే రాక్షసి ఆయనను చంపేందుకు వచ్చిందని పురాణ కథనం చెబుతుంది. ఆమె విషపూరితమైన పాలను ఇచ్చి కృష్ణుడిని సంహరించాలని ప్రయత్నించినప్పటికీ, కృష్ణుడు ఆమె ప్రాణాలను హరించాడని కథనం.
యమునా నదిలో కాళీయుడు అనే విషసర్పం నివసించేవాడని పురాణ కథనం చెబుతుంది. దాని విషం కారణంగా నది పరిసరాలు ప్రమాదకరంగా మారాయని కథనం. కృష్ణుడు కాళీయుడి పడగలపై నృత్యం చేసి అతడిని అదుపులోకి తీసుకున్నాడని ప్రసిద్ధ కథ ఉంది.ఇలాంటి కథలన్నీ కృష్ణుడి బాల్యంలో ఎదురైన ప్రమాదాలను సూచిస్తాయి. అందుకే బాలకృష్ణుడి రూపాన్ని ధైర్యం, రక్షణ, దైవత్వానికి ప్రతీకగా కూడా భక్తులు భావిస్తారు.
12 సంవత్సరాల లోపు మాత్రమే కృష్ణుడి వేషం వేయాలా?
12 సంవత్సరాల లోపు పిల్లలే కృష్ణుడి వేషం వేయాలి.. ఆ తర్వాత వేయకూడదు.. అనే సార్వత్రికమైన శాస్త్ర నియమం ఉందని ఖచ్చితంగా చెప్పడానికి ఆధారం లేదు. కొన్ని ప్రాంతీయ, కుటుంబ లేదా సాంస్కృతిక సంప్రదాయాల్లో బాలకృష్ణుడి వేషాన్ని చిన్న పిల్లలకే పరిమితం చేసే ఆచారం ఉండవచ్చు. దీనికి ప్రధాన కారణం కృష్ణుడి “బాల రూపం” కావచ్చు. చిన్న పిల్లవాడిని బాలకృష్ణుడిగా అలంకరించినప్పుడు ఆయన బాల్యలీలలు సహజంగా ప్రతిబింబిస్తాయి. వయసు పెరిగేకొద్దీ కృష్ణుడి రూపాన్ని యువకృష్ణుడు, గోపాలకృష్ణుడు లేదా ఇతర రూపాల్లో కూడా ప్రదర్శించే సంప్రదాయాలు ఉన్నాయి.
భారతీయ సంప్రదాయాల్లో బాల్యం, కౌమారం, యౌవనం వంటి దశలకు వేర్వేరు భావనలు ఉన్నాయి. కొన్ని ఆచారాల్లో సుమారు 12 సంవత్సరాల వయసును బాల్య దశ నుంచి తదుపరి దశకు మారే ముఖ్యమైన వయస్సుగా పరిగణించే సంప్రదాయాలు కనిపిస్తాయి. అందువల్ల బాలకృష్ణుడి వేషధారణను చిన్నారులకే పరిమితం చేయాలనే భావన కొన్ని ప్రాంతాల్లో ఏర్పడి ఉండవచ్చు.
