వ్యవసాయం అంటే పగలంతా కష్టపడినా చివరికి మిగిలేది అప్పులే అన్న భావన చాలామంది రైతులది. కానీ మారిన కాలానికి అనుగుణంగా ఆలోచిస్తే వ్యవసాయ భూమి కూడా బంగారు గనిలాంటిదే. కేవలం పంటలు పండించడమే కాకుండా, కాస్త పెట్టుబడితో ఆ భూమిని టూరిజం వైపు మళ్లించి లక్షల్లో ఆదాయం సంపాదించవచ్చు. అదే ఫాం హౌస్ వ్యాపారం.
ఎలాంటి ఫాం హౌస్?
పట్టణాల నుంచి దూరంగా, పచ్చని పంట పొలాల మధ్య ప్రశాంతమైన వాతావరణంలో ఉండే ఫాం హౌస్ లకు ప్రస్తుతం గిరాకీ ఎక్కువ. ఇక్కడ విశ్రాంతి తీసుకోవడానికి, వీకెండ్స్ గడపడానికి, చిన్న చిన్న పార్టీలు చేసుకోవడానికి నగరవాసులు ఇష్టపడతారు. వీటిలో అన్ని సౌకర్యాలతో లగ్జరీ ఫాం హౌస్ ను నిర్మించుకోవచ్చు. పెద్ద స్విమ్మింగ్ పూల్, గార్డెన్, ఎయిర్ కండిషన్డ్ గదులు, వైఫై వంటివి ఉంటాయి. సాధారణ ఫాం హౌస్ అంటే ఒక వంటగది, రెండు గదులు, స్నానపు గదులు వంటి ప్రాథమిక సౌకర్యాలు ఉన్నవి. పర్యావరణ అనుకూల ఫాం హౌస్ అంటే వెదురుతో లేదా మట్టితో నిర్మించినవి. ఇవి ప్రకృతితో మమేకమైన అనుభూతిని ఇస్తాయి. వీటికి కూడా డిమాండ్ ఉంది.
పెట్టుబడి ఎంత? ఆదాయం ఎలా?
తక్కువ పెట్టుబడితో ఫాంహౌజ్ ను ప్రారంభించాలంటే, ఉన్న ఇంటికి కొన్ని మార్పులు చేసి, చిన్న గార్డెన్ ఏర్పాటు చేసుకోవచ్చు. దీనికి రూ. 50,000 నుంచి రూ. 1 లక్ష వరకు సరిపోతుంది. పెద్ద పెట్టుబడితో అన్ని సౌకర్యాలతో కూడిన లగ్జరీ ఫాం హౌస్ నిర్మించాలంటే రూ. 10 లక్షల నుంచి రూ. 20 లక్షల వరకు కావొచ్చు. ఖర్చుకు తగ్గట్టుగా ఆదాయం కూడా ఉంటుంది. ఒక రోజుకు ఫాం హౌస్ అద్దె రూ. 5,000 నుంచి రూ. 25,000 వరకు ఉంటుంది. సీజన్ను బట్టి ఈ ధరలు మరింత పెరిగే అవకాశం ఉంది. నెలలో 10 రోజులు అద్దెకు వెళ్ళినా, రూ. 50,000 నుంచి రూ. 2.5 లక్షల వరకు సంపాదించవచ్చు.
గ్రామీణ టూరిజం.. అదనపు ఆదాయం..
కేవలం ఫాం హౌస్ అద్దెతోనే కాకుండా, పర్యాటకుల కోసం మరిన్ని ఆకర్షణలు ఏర్పాటు చేసి అదనపు ఆదాయం సంపాదించవచ్చు. పర్యాటకుల చేత పంటలు పండించడం, కలుపు తీయడం వంటివి చేయించవచ్చు. దీనివల్ల నగరవాసులకు ఒక కొత్త అనుభవం లభిస్తుంది. క్యాంపింగ్ ఇష్టపడేవారికి తాత్కాలికంగా టెంట్లు, గూడాలు ఏర్పాటు చేయవచ్చు. పల్లెటూరి వంటల రుచిని చూపించవచ్చు. దీనికోసం ప్రత్యేకంగా వంటలు చేసేవారిని నియమించుకోవచ్చు.కబడ్డీ, వాలీబాల్ వంటి ఆటలు ఆడేందుకు ఏర్పాట్లు చేయవచ్చు.
దీని గురించి ఎలా చెప్పాలి?
సోషల్ మీడియా, ట్రావెల్ వెబ్సైట్స్ ద్వారా మీ ఫాం హౌస్ గురించి విస్తృతంగా ప్రచారం చేయవచ్చు. ఫాం హౌస్ కు చుట్టుపక్కల మంచి భద్రతా ఏర్పాట్లు చేయాలి. పరిశుభ్రమైన వాతావరణం, మంచి సేవలు అందిస్తే కస్టమర్లు మళ్లీ మళ్లీ వస్తారు. రహదారికి దగ్గరగా ఉండి, సులభంగా చేరుకోగలిగే ప్రదేశంలో ఫాం హౌస్ ఉంటే మంచిది.
ఫాం హౌస్ వ్యాపారం అనేది రైతులకు వారి ఆదాయాన్ని పెంచుకోవడానికి ఒక కొత్త మార్గం. ఇది కేవలం డబ్బు సంపాదన మాత్రమే కాదు, వ్యవసాయ భూమికి ఒక కొత్త విలువను కూడా జోడిస్తుంది. కాస్త ఆలోచన, కొద్దిగా పెట్టుబడి ఉంటే, రైతులు పంటలు పండించినట్లే లాభాలు కూడా పండించుకోవచ్చు. అంతేకాకుండా ఒక భూమిలో కొంత వరకు ఫాం హౌస్ నిర్మించి మిగతా భూమిలో పంటలు కూడా పండించుకోవచ్చు.
