Personal Loan: మధ్యతరగతి కుటుంబాల్లో ఎప్పుడు ఎలాంటి ఆర్థిక అవసరం వస్తుందో ముందే చెప్పడం కష్టం. అందుకే పర్సనల్ లోన్ మంచిదా? లేక ఓవర్డ్రాఫ్ట్ (OD) బెటరా? అనేది తెలుసుకోవడం చాలా ముఖ్యం.
పిల్లల ఫీజులు, వైద్య ఖర్చులు, ఇంటి మరమ్మతులు, వ్యాపార అవసరాలు.. ఇలా ఒక్కసారిగా డబ్బు అవసరం వచ్చినప్పుడు చాలా మంది బ్యాంకుల చుట్టూ తిరుగుతుంటారు. కానీ అర్జంట్ సమయంలో తీసుకునే నిర్ణయం తర్వాత పెద్ద భారం కావొచ్చు. అందుకే పర్సనల్ లోన్ మంచిదా? లేక ఓవర్డ్రాఫ్ట్ (OD) బెటరా? అనే విషయం ముందే తెలుసుకోవడం చాలా ముఖ్యం.
ఓవర్డ్రాఫ్ట్ అంటే ఏమిటి?
ఓవర్డ్రాఫ్ట్ అనేది బ్యాంక్ మీకు ఇచ్చే ఒక ప్రత్యేక నగదు పరిమితి. మీ సేవింగ్స్ లేదా కరెంట్ అకౌంట్లో డబ్బు లేకపోయినా, బ్యాంక్ ముందుగా నిర్ణయించిన లిమిట్ వరకు మీరు డబ్బు తీసుకునే అవకాశం ఇస్తుంది. ఉదాహరణకు బ్యాంక్ రూ.2 లక్షల ఓవర్డ్రాఫ్ట్ లిమిట్ ఇచ్చిందనుకుందాం. కానీ మీకు వెంటనే అవసరం అయినది రూ.20,000 మాత్రమే అయితే, మీరు అంత మొత్తమే వాడుకోవచ్చు.
Save Money: ఈ ఐదింటిని తగ్గిస్తే.. ఆర్థిక కష్టాలు ఉండవు.. – insightearth.in – Telugu News Portal
ఇందులో ముఖ్యమైన ప్రయోజనం ఏమిటంటే.. మీరు వాడిన మొత్తంపైనే, వాడిన రోజులకే వడ్డీ పడుతుంది. అంటే రూ.20,000 తీసుకుని వారం రోజుల్లో తిరిగి చెల్లిస్తే, ఆ వారం రోజులకు మాత్రమే వడ్డీ కట్టాలి. మిగిలిన లిమిట్పై ఎలాంటి వడ్డీ ఉండదు. అందుకే తరచూ నగదు అవసరాలు ఉండే వ్యాపారులు, ఫ్రీలాన్సర్లు, చిన్న వ్యాపారాలు చేసే వారికి ఓవర్డ్రాఫ్ట్ చాలా ఉపయోగపడుతుంది.
పర్సనల్ లోన్ ఎలా పనిచేస్తుంది?
పర్సనల్ లోన్ మాత్రం పూర్తిగా భిన్నంగా ఉంటుంది. బ్యాంక్ మీకు రూ.2 లక్షల లోన్ మంజూరు చేస్తే, ఆ మొత్తం ఒకేసారి మీ ఖాతాలో జమ అవుతుంది. మీరు ఆ డబ్బును మొత్తం వాడినా, వాడకపోయినా, మొదటి రోజు నుంచే మొత్తం మొత్తంపై వడ్డీ లెక్కించడం ప్రారంభమవుతుంది.
దీనికి నిర్దిష్ట కాలపరిమితి (టెన్యూర్), ప్రతి నెలా చెల్లించాల్సిన ఈఎంఐ (EMI) ఉంటాయి. ఒకసారి లోన్ తీసుకున్నాక, నిర్ణయించిన కాలం వరకు EMIలు క్రమం తప్పకుండా చెల్లించాల్సిందే. అందువల్ల ముందే ప్లాన్ చేసిన ఖర్చులు — పెళ్లి, ఇంటి ఫర్నిచర్, మెడికల్ ట్రీట్మెంట్, ట్రావెల్ లేదా పెద్ద కొనుగోళ్లకు పర్సనల్ లోన్ బాగా సెట్ అవుతుంది.
మధ్యతరగతికి ఏది బెటర్?
మీ అవసరం ఎలా ఉందో దానిపై సమాధానం ఆధారపడి ఉంటుంది. ఒకేసారి పెద్ద మొత్తం అవసరం ఉండి, ఖర్చు కూడా ముందే నిర్ణయించుకుని ఉంటే పర్సనల్ లోన్ బెటర్. ఎందుకంటే EMI రూపంలో ప్లాన్ ప్రకారం చెల్లించవచ్చు.
కానీ ఎప్పుడు ఎంత డబ్బు అవసరం అవుతుందో తెలియని పరిస్థితుల్లో, ముఖ్యంగా వ్యాపారాల్లో క్యాష్ ఫ్లో సమస్యలు ఎదురైనప్పుడు ఓవర్డ్రాఫ్ట్ చాలా ఉపయోగకరం. అవసరమైనంత మాత్రమే వాడుకోవచ్చు కాబట్టి వడ్డీ భారం కూడా తగ్గుతుంది.
