ఆభరణం మాయమైందని వార్తలు..
వివరణ ఇచ్చిన అధికారులు
అసలు ఏం జరిగిందంటే.?
Sabarimala Gold Crown Controversy :ప్రముఖ శబరిమలై అయ్యప్ప ఆలయానికి సంబంధించిన బంగారు కిరీటం వ్యవహారం ప్రస్తుతం చర్చనీయాంశంగా మారింది. ఆలయ సన్నిధానంలోని బంగారు కిరీటం కనిపించలేదంటూ కొన్ని కథనాలు వెలువడటంతో భక్తుల్లోనూ, అధికార వర్గాల్లోనూ ఆందోళన నెలకొంది. అయితే కిరీటం మాయమైందన్న వార్తల్లో వాస్తవం లేదని, స్వర్ణ కిరీటం సురక్షితంగానే ఉందని ట్రావెన్కోర్ దేవస్వం బోర్డు తిరువాభరణం కమిషనర్ స్పష్టం చేసినట్లు సమాచారం.
అసలు వివాదం ఎక్కడ మొదలైంది?
శబరిమలై ఆలయంలో ద్వారపాలక దేవతల విగ్రహాలకు బంగారు పూత వేయడం, గర్భగుడి తలుపులకు బంగారు రేకులు అమర్చడం వంటి పనులకు సంబంధించి అవకతవకల ఆరోపణలపై ఇప్పటికే విచారణ జరుగుతోంది. ఈ వ్యవహారానికి సంబంధించిన కేసులో కేరళ హైకోర్టు ఆదేశాల మేరకు ఆలయంలోని విలువైన ఆభరణాలు, తిరువాభరణాలపై ప్రత్యేక తనిఖీలు చేపట్టారు. సన్నిధానంతో పాటు అరణ్ములలోని స్ట్రాంగ్రూమ్లలో ఉన్న ఆభరణాలను కూడా పరిశీలించారు.
తనిఖీల్లో కిరీటం వ్యవహారం
ఈ తనిఖీల సమయంలోనే ఓ బంగారు కిరీటానికి సంబంధించిన వివరాల్లో వ్యత్యాసం ఉన్నట్లు కొన్ని మీడియా కథనాలు వెలువడ్డాయి. 2012లో తమిళనాడుకు చెందిన ఓ భక్తుడు అయ్యప్ప స్వామికి ఈ కిరీటాన్ని కానుకగా సమర్పించినట్లు రికార్డుల్లో ఉంది. విలువైన అలంకరణ రాళ్లతో కలిపి ఆ కిరీటం బరువు 445.78 గ్రాములుగా నమోదైనట్లు సమాచారం. అయితే తనిఖీల సమయంలో స్ట్రాంగ్రూమ్లో లభించిన కిరీటం బరువు సుమారు 240 గ్రాములు మాత్రమే ఉన్నట్లు కొన్ని కథనాలు పేర్కొన్నాయి. దీంతో అసలు కిరీటం స్థానంలో మరో కిరీటాన్ని ఉంచారా? అసలు బంగారు కిరీటం ఎక్కడ ఉంది? అనే సందేహాలు వ్యక్తమయ్యాయి.
అధికారుల వివరణతో తొలగిన అనుమానాలు
ఈ వార్తలు మీడియాలో విస్తృతంగా ప్రచారం కావడంతో ట్రావెన్కోర్ దేవస్వం బోర్డు తిరువాభరణం కమిషనర్ స్పందించారు. బంగారు కిరీటం మాయమైందన్న ప్రచారంలో వాస్తవం లేదని ఆయన స్పష్టం చేసినట్లు సమాచారం. ఈ అంశంపై బోర్డుకు అధికారిక నివేదికను కూడా సమర్పించినట్లు తెలుస్తోంది. భక్తులు ఆలయానికి సమర్పించే ఆభరణాలను సంబంధిత స్ట్రాంగ్రూమ్లలో భద్రపరుస్తామని అధికారులు వివరించారు. వాటిలో అసలైన బంగారు ఆభరణాలతో పాటు ఇమిటేషన్ ఆభరణాలు కూడా ఉంటాయని తెలిపారు. దీంతో తనిఖీల సమయంలో కనిపించిన కిరీటం విషయంలో మొదట గందరగోళం ఏర్పడి ఉండవచ్చని పేర్కొన్నారు.
రిజిస్టర్ పరిశీలనతో స్పష్టత
2012లో భక్తుడు సమర్పించిన బంగారు కిరీటాన్ని అప్పటి నుంచి భద్రంగానే ఉంచినట్లు రికార్డులు వెల్లడిస్తున్నాయని తిరువాభరణం కమిషనర్ వివరించినట్లు సమాచారం. తనిఖీల సమయంలో ఏర్పడిన సందేహాల నేపథ్యంలో స్ట్రాంగ్రూమ్ రిజిస్టర్లు, అందులో నమోదైన వివరాలను మరోసారి పరిశీలించారు. ఈ పరిశీలన అనంతరం కిరీటం సురక్షితంగానే ఉన్నట్లు నిర్ధారణకు వచ్చినట్లు ఆయన నివేదికలో పేర్కొన్నట్లు తెలుస్తోంది.
శబరిమలై బంగారు కిరీటం వ్యవహారం తొలుత పెద్ద వివాదానికి దారితీసినా, సంబంధిత అధికారులు మాత్రం కిరీటం భద్రంగానే ఉందని స్పష్టం చేస్తున్నారు. అయితే తనిఖీల సమయంలో బరువు, రికార్డులు, కిరీటం నిల్వకు సంబంధించిన వివరాలపై ఎందుకు గందరగోళం ఏర్పడిందనే అంశం మాత్రం ప్రాధాన్యం సంతరించుకుంది. హైకోర్టు ఆదేశాల మేరకు కొనసాగుతున్న విలువైన వస్తువుల తనిఖీలు పూర్తయిన తర్వాత ఈ వ్యవహారంపై మరింత స్పష్టత వచ్చే అవకాశం ఉంది.
