Car Accident In Siddipet:సిద్దిపేట: సిద్దిపేట జిల్లాలో గురువారం తెల్లవారుజామున తీవ్ర విషాదం చోటుచేసుకుంది. దుబ్బాక మండలం అప్పన్నపల్లి గ్రామ శివారులో ఓ కారు అదుపుతప్పి రోడ్డు పక్కన ఉన్న బావిలోకి దూసుకెళ్లిన ఘటనలో ఒకే కుటుంబానికి చెందిన నలుగురు మృతి చెందారు. మృతుల్లో ఇద్దరు చిన్నారులు ఉండటంతో బల్వంతపూర్ గ్రామంలో విషాదఛాయలు అలముకున్నాయి.
పోలీసులు తెలిపిన వివరాల ప్రకారం.. దుబ్బాక మండలం బల్వంతపూర్కు చెందిన దండుగుల రాజు (30) ఇసుక వ్యాపారం చేస్తూ జీవనం సాగిస్తున్నాడు. బంధువుల దశదినకర్మకు హాజరయ్యేందుకు భార్య భాగ్య (25), కుమారుడు నిహాన్స్ (4), కుమార్తె శాన్విక (2)తో కలిసి సిద్దిపేటకు వెళ్లారు. కార్యక్రమం ముగించుకుని రాత్రివేళ కారులో స్వగ్రామానికి తిరుగు ప్రయాణమయ్యారు.అప్పన్నపల్లి గ్రామ శివారుకు చేరుకున్న సమయంలో కారు అదుపుతప్పినట్లు తెలుస్తోంది. దీంతో రోడ్డు పక్కనే ఉన్న లోతైన బావిలోకి కారు దూసుకెళ్లింది. ప్రమాదం జరిగిన విషయం కొంతసేపటి తర్వాత స్థానికుల దృష్టికి వచ్చింది. వెంటనే వారు పోలీసులకు, అగ్నిమాపక సిబ్బందికి సమాచారం అందించారు.
సమాచారం అందుకున్న పోలీసులు, అగ్నిమాపక సిబ్బంది ఘటనాస్థలికి చేరుకున్నారు. స్థానికుల సహకారంతో సహాయక చర్యలు చేపట్టారు. బావి లోతుగా ఉండటంతో క్రేన్ను రప్పించి నీటిలో మునిగిపోయిన కారును బయటకు తీశారు. అయితే అప్పటికే కారులో ఉన్న నలుగురు మృతి చెందినట్లు గుర్తించారు.
ప్రమాదంలో రాజు, ఆయన భార్య భాగ్యతో పాటు వారి కుమారుడు నిహాన్స్, కుమార్తె శాన్విక మృతి చెందారు. కారు పూర్తిగా నీటిలో మునిగిపోవడంతో ఊపిరాడక మృతి చెందినట్లు ప్రాథమికంగా తెలుస్తోంది. చిన్నారులు సహా ఒకే కుటుంబానికి చెందిన నలుగురు మృతి చెందడంతో బల్వంతపూర్లో విషాదం నెలకొంది.
ఘటనపై పోలీసులు కేసు నమోదు చేసి దర్యాప్తు చేపట్టారు. కారు అదుపుతప్పడానికి గల కారణాలపై ఆరా తీస్తున్నారు. ప్రమాదం జరిగిన సమయంలో రహదారి పరిస్థితులు, వాహనం వేగం, డ్రైవింగ్కు సంబంధించిన అంశాలను కూడా పరిశీలిస్తున్నట్లు తెలుస్తోంది. ప్రమాదానికి సంబంధించిన పూర్తి వివరాలు పోలీసుల దర్యాప్తులో వెల్లడికానున్నాయి.
