బంగారం ధరలు ఇటీవల పెరుగుతూ తగ్గుతున్నాయి. దీంతో అవసరం ఉన్నవారు బంగారం కొనుగోలు చేస్తున్నారు.. కొందరు భవిష్యత్ ను దృష్టిలో ఉంచుకొని దక్కించుకుంటున్నారు. అయితే ఇలాంటి సమయంలోనే నకిలీ బంగారం మార్కెట్లోకి వస్తుందన్న వార్తలు వస్తున్నాయి. ఇటీవలి కాలంలో మార్కెట్లో ‘బంగ్లాదేశ్ రెడ్ గోల్డ్’ పేరుతో నకిలీ లోహం విస్తృతంగా చక్కర్లు కొడుతోంది. ఇది బయటకు చూస్తే అచ్చం బంగారంలానే మెరిసిపోతుంది. రంగు, బరువు, ఆకృతి అన్నీ దాదాపు బంగారంనే తలపిస్తాయి. కానీ ఇది అసలైన బంగారం కాదు. ఈ లోహాన్ని కట్ చేసినా కూడా బంగారం రంగులతోనే ఉంటుంది. వాస్తవానికి ఇది కాపర్, బ్రాస్ వంటి లోహాల మిశ్రమంతో తయారైన ఒక రకం నకిలీ మెటల్ మాత్రమే.
రెడ్ గోల్డ్ ఎలా మోసం చేస్తుంది?
ఈ రెడ్ గోల్డ్లో కాపర్ శాతం ఎక్కువగా ఉంటుంది. అందుకే కొద్దిగా ఎర్రటి ఛాయతో బంగారంలా మెరుస్తుంది. పైగా గోల్డ్ పాలిష్ చేయడంతో అసలైన బంగారంతో తేడా గుర్తించడం కష్టంగా మారుతుంది. కొంతకాలం వాడిన తర్వాత రంగు మారడం, మెరుపు తగ్గడం, చర్మంపై రియాక్షన్ రావడం వంటి లక్షణాలు కనిపిస్తాయి. కానీ కొనుగోలు సమయంలో మాత్రం ఇది అసలైన బంగారంలానే కనిపించి మోసం చేస్తుంది.
ఈ నకిలీ “రెడ్ గోల్డ్” ప్రధానంగా కాపర్ (రాగి) ఆధారంగా తయారవుతుంది. కాపర్కు సహజంగా ఉండే ఎర్రటి మెరుపు బంగారానికి దగ్గరగా కనిపిస్తుంది. దీనికి కొద్దిపాటి ఇతర లోహాలు (బ్రాస్, జింక్, నికెల్ లాంటి బేస్ మెటల్స్) కలిపి రంగు, బరువు, దృఢత్వాన్ని బంగారంలా కనిపించేలా మార్చుతారు. ఈ మిశ్రమాన్ని కరిగించి అచ్చుల్లో పోసి ఆభరణాల ఆకారంలో తయారు చేస్తారు. ఆ తర్వాత పైభాగంపై గోల్డ్ పాలిష్ / ఎలక్ట్రోప్లేటింగ్ చేస్తారు. ఈ కోటింగ్ వల్ల బయటకు చూస్తే ఇది అచ్చం 22 క్యారెట్ బంగారంలా మెరిసిపోతుంది. కొత్తగా ఉన్నప్పుడు అసలు బంగారంతో తేడా గుర్తించడం చాలా కష్టం.
ఎందుకు “రెడ్” గోల్డ్ అంటారు?
కాపర్ శాతం ఎక్కువగా ఉండటం వల్ల దీనికి కొద్దిగా ఎర్రటి ఛాయ (reddish tone) కనిపిస్తుంది. అందుకే దీన్ని “రెడ్ గోల్డ్” అని పిలుస్తారు. కొందరు దీన్ని “బంగ్లాదేశ్ గోల్డ్” అంటూ విదేశీ పేరుతో మార్కెట్లోకి తెచ్చి నమ్మకం కలిగించే ప్రయత్నం చేస్తారు. కొంతకాలం వాడిన తర్వాత ఈ నకిలీ గోల్డ్పై ఉన్న కోటింగ్ ఊడిపోతుంది. అప్పుడు లోపలున్న కాపర్ బయటపడి రంగు మారుతుంది, మెరుపు తగ్గుతుంది. కొందరికి చర్మంపై అలర్జీ, నల్ల మచ్చలు కూడా వస్తాయి. అప్పుడు ఇది అసలైన బంగారం కాదని స్పష్టమవుతుంది.
అసలైన బంగారం ఎలా గుర్తించాలి?
నిజమైన బంగారం ఎప్పుడూ తుప్పు పట్టదు, రంగు మారదు. మాగ్నెట్ దగ్గర పెట్టితే ఆకర్షితమవ్వదు. అలాగే బంగారం చాలా మృదువైన లోహం. చిన్న గీతలు సులభంగా పడతాయి. అయినా ఇవన్నీ ప్రాథమిక పరీక్షలే. పూర్తిగా నిర్ధారించాలంటే హాల్మార్క్, క్యారెట్ విలువ చాలా కీలకం.
హాల్మార్క్ తప్పనిసరి
భారతదేశంలో BIS (Bureau of Indian Standards) హాల్మార్క్ ఉన్న బంగారమే విశ్వసనీయమైనది. ఆభరణంపై BIS లోగో, క్యారెట్ (22K, 18K), జ్యూవెలర్ గుర్తింపు కోడ్, సంవత్సర గుర్తు ఉండాలి. ఇవి లేకపోతే అది నకిలీ అయ్యే అవకాశం ఎక్కువ. ఎప్పుడూ నమ్మకమైన షాపుల్లోనే కొనాలి. బిల్ తప్పనిసరిగా తీసుకోవాలి. బంగారం బరువు, మేకింగ్ చార్జీలు స్పష్టంగా అడగాలి. చాలా తక్కువ ధరకు ఇస్తామంటే అప్రమత్తంగా ఉండాలి. అవసరమైతే షాపులోనే క్యారెట్ మీటర్తో పరీక్ష చేయించుకోవాలి.బంగారం ఒక ఆభరణం మాత్రమే కాదు.. అది పెట్టుబడీ కూడా. కాబట్టి రెడ్ గోల్డ్ లాంటి మోసాలకు గురికాకుండా సరైన అవగాహనతో, జాగ్రత్తగా కొనుగోలు చేయడమే తెలివైన నిర్ణయం.
బంగ్లాదేశ్ రెడ్ గోల్డ్ను వెంటనే గుర్తించడానికి ఉపయోగపడే 5 సులభమైన టెస్టులు ఇవి… ఇవి ఇంట్లో లేదా షాపులోనే చేయవచ్చు
మాగ్నెట్ టెస్ట్: అసలైన బంగారం మాగ్నెట్కు అస్సలు అంటుకోదు.
ఒక చిన్న మాగ్నెట్ దగ్గర పెట్టండి. ఆకర్షితమైతే అది రెడ్ గోల్డ్ లేదా నకిలీ లోహం. కదలకపోతే బంగారం అయ్యే అవకాశం ఉంది.
రంగు మార్పు టెస్ట్: రెడ్ గోల్డ్పై సాధారణంగా గోల్డ్ పాలిష్ ఉంటుంది. కొద్దిరోజులు వాడితే లేదా రుద్దితే ఎర్రటి/నల్లటి రంగు బయటపడుతుంది.అసలైన బంగారం మాత్రం ఎప్పుడూ రంగు మారదు.
నీటి టెస్ట్: ఒక గ్లాసు నీటిలో ఆభరణాన్ని వదలండి. నేరుగా కిందికి పడితే.. బరువు ఎక్కువగా ఉండటం వల్ల బంగారం అయ్యే ఛాన్స్ ఉంది. తేలితే లేదా నెమ్మదిగా పడితే.. నకిలీ అయ్యే అవకాశం ఎక్కువ.
చర్మంపై రియాక్షన్ టెస్ట్: కొంతసేపు ధరించి చూడండి. చెమట పట్టిన చోట నల్ల మచ్చలు, గ్రీన్ కలర్ వస్తే అది రెడ్ గోల్డ్. అసలైన బంగారం చర్మానికి ఎలాంటి రియాక్షన్ ఇవ్వదు. హాల్మార్క్ చెక్ – అత్యంత ముఖ్యమైనది
ఆభరణంపై తప్పనిసరిగా ఇవి ఉండాలి:
BIS లోగో
క్యారెట్ గుర్తు (22K / 18K)
జ్యూవెలర్ కోడ్
సంవత్సరం గుర్తు
ఇవి లేకపోతే ఎంత మెరిసినా కొనొద్దు.
